Korte Suprema, Ibinasura ang mga Petisyon Laban sa NCAP

Inalis na ng Korte Suprema ang Temporary Restraining Order o TRO at tuluyan nang ibinasura ang tatlong pinagsamang petisyon na kumukuwestiyon sa legalidad ng No Contact Apprehension Policy o NCAP sa limang lungsod sa Metro Manila. Dahil sa desisyong ito ng mataas na hukuman, maaari nang muling ipatupad ang nasabing sistema kung saan ginagamitan ng mga digital camera ang mga pangunahing kalsada upang huliin at idokumento ang mga lumalabag sa batas trapiko.

Ayon sa naging desisyon ng korte na isinulat ni Associate Justice Rodil Zalameda, nawalan na ng saysay o naging moot ang mga inihain na petisyon laban sa mga lumang ordinansa ng Maynila, Quezon City, Valenzuela, Parañaque, at Muntinlupa. Ito ay matapos ipatupad ang Metro Manila Traffic Code noong taong 2023 na naglalayong magkaroon ng iisang sistema at pare-parehong multa sa buong rehiyon. Dahil nakadikit na ang mga bagong patakaran ng mga lokal na pamahalaan sa bagong traffic code na ito, hindi na kailangan pang maglabas ng desisyon ang korte ukol sa mga lumang ordinansa na nauna nang inireklamo.

Bukod sa usapin ng kawalan ng legal na epekto, binigyang-diin din ng Korte Suprema na maraming kakulangan sa proseso ang mga petisyong inihain ng mga transport group at ilang indibidwal.