Pangarap at Alaala ng Yumaong Ama, Kinilala sa Tagumpay ni Nina

Ibinahagi ng OPM Soul Siren na si Nina ang mahalagang papel ng kanyang yumaong amang si Filbert Girado sa kanyang karera sa musika. Ang kanyang ama ang unang nagturo sa kanya kumanta dahil pangarap din nitong maging isang mang-aawit noong kabataan nito. Subalit dahil sa sariling kabiguan sa larangan ng musika, pinatututok niya si Nina sa pag-aaral at hinimok na kumuha ng kursong Accountancy upang magkaroon ng mas tiyak na kinabukasan.

Sa kabila ng pagtutol ng kanyang ama, patagong nag-record ng album si Nina sa pag-asang maisusorpresa niya ito balang araw. Ngunit bago pa man mailabas ang kanyang kauna-unahang album na “Heaven” noong 2002, pumanaw ang kanyang ama dahil sa atake sa puso noong taong 2000. Bagamat may halong lungkot at panghihinayang na hindi naabot ng kanyang ama ang kanyang mga tagumpay, bitbit pa rin ni Nina ang mga aral at alaala nito sa bawat kantang kanyang inihahandog sa publiko.