Pilipinas, Nakasungkit ng Silver at Bronze sa Aichi-Nagoya Asian Games

Puno ng tagumpay at panghihinayang ang naging kampanya ng Atletang Pinoy sa Aichi-Nagoya 2026 Asian Games matapos mag-uwi ng medalya kasabay ng ilang malalapit na pagkatalo.

Pangunahing bida sa tagumpay ang MMA fighter na si Jean Claude “The Dynamite” Saclag na nag-uwi ng pilak na medalya sa men’s traditional 65kg final laban kay Otabek Rajabov ng Tajikistan. Nag-ambag din ng tanso ang women’s karate kata team nina Samantha Emmanuelle Veguillas, Ysabielle Arrogante, at Rebecca Cyril Torres matapos talunin ang Thailand. Buwenas din ang Gilas Pilipinas Women 3×3 basketball team nang gulatin ang Mongolia at Macau, habang winakasan naman ng Philippine U23 football team ang matagal na paghahangad ng panalo sa Asiad mula pa noong 1958 sa kanilang 2-1 tagumpay laban sa Kuwait.

Sa kabila ng mga tagumpay na ito, naranasan din ng bansa ang ilang masakit na pagkatalo. Mabilis na nagwakas ang laban ng Olympic bronze medalist na si Aira Villegas sa boxing, habang kapos naman ang pambato sa gymnastics. Muntik naman makapasok sa podium ang swimmer na si Kayla Sanchez na pumang-apat sa 50m backstroke final, bagamat dalawang beses niyang nabasag ang pambansang rekor sa loob lamang ng isang araw.