Trabaho ng International Criminal Court, tuloy pa rin kahit wala na si prosecutor Karim Khan

Tiniyak ng International Criminal Court na magpapatuloy nang walang anumang abala ang kanilang mga imbestigasyon at operasyon matapos opisyal na patalsikin sa pwesto ang punong prosecutor na si Karim Khan dahil sa usapin ng seryosong maling pag-uugali at paglabag sa tungkulin.

Nagmula ang desisyon sa botohan ng Assembly of States Parties sa United Nations headquarters sa New York kung saan 82 sa 152 miyembro ang bumoto upang alisin sa katungkulan ang 56-anyos na prosecutor. Bago ang naturang botohan, nauna nang naghain ng pansamantalang pagliban sa tungkulin si Khan noong Mayo 2025 kasunod ng mga reklamo ng sexual assault mula sa isa niyang dating kawani, bagay na mariing itinanggi ng dating prosecutor.

Sa opisyal na pahayag ng korte, sinabi nitong mananatiling matatag ang kanilang mandato sa tulong ng mga kawani at ng dalawang deputy prosecutor na sina Nazhat Shameem Khan at Mame Mandiaye Niang na kasalukuyang nangunguna sa tanggapan. Nais din nilang magbigay ng katiyakan sa mga biktima, mga apektadong komunidad, at mga kasaping bansa na hindi hihinto ang pag-usad ng hustisya.