Suarez, pinadalhan ng matinding babala si Emanuel Navarrete matapos ang mabilis na knockout!

Pinatunayan ng Pilipinong boksingero na si Charly Suarez na handa na niyang bawiin ang nararapat sa kanya matapos patumbahin ang Mehikanong si Manuel Avila sa unang round pa lamang ng kanilang laban para sa WBO International title sa California. Isang nagbabagang kanang diretso sa panga ang pinakawalan ni Suarez na nagdulot ng pagbagsak ni Avila. Bagamat nagawa pang tumayo ng kalaban, hindi na nito napanatili ang kanyang balanse dahilan upang agad na itigil ng referee ang sagupaan sa loob lamang ng dalawang minuto at tatlumpu’t isang segundo.

Dahil sa mabilis na panalong ito, nagpadala ng malinaw na mensahe si Suarez sa kasalukuyang WBO at IBF super featherweight champion na si Emanuel Navarrete. Bilang nangungunang humahamon sa WBO, matagal nang naghihintay ang 37-anyos na Pilipino para sa isang rematch matapos ideklarang walang bisa ang kanilang unang tapatan noong nakaraang taon. Ayon kay Suarez, kung patuloy siyang iiwasan ni Navarrete para sa iba pang laban, mas mabuting isuko na lamang ng kampeon ang kanyang sinturon upang mabigyan ng pagkakataon ang mga karapat-dapat na boksingero.