Liza Soberano at H.E.R., Ibinahagi ang Halaga ng Kultura ng mga Pilipino sa Forgotten Island

Ipinaliliwanag ng mga aktres na sina Liza Soberano at H.E.R. (Gabrielle Sarmiento Wilson) kung paano itinampok sa kanilang bagong animated film na Forgotten Island ang likas na pagiging maalaga at ang diwa ng bayanihan ng mga Pilipino. Sa isang eksklusibong panayam, ibinahagi ng dalawang Filipino-American stars na ang pelikula—na inspirasyon ng mitolohiya at kultura ng Pilipinas—ay nakatuon sa tema ng itinuturing na pamilya o found family.

Ayon sa Grammy winner na si H.E.R., kapansin-pansin sa kulturang Pilipino ang mainit na pagtanggap sa kapwa kung saan agad na itinuturing na kabahagi ng pamilya ang sinuman. Dagdag naman ni Liza, ipinapakita ng pelikula ang bayanihan kung saan handing tumulong at magmalasakit ang mga Pilipino saanman sa mundo nang walang kapalit. Mapapanood ang pelikulang ipinroduce ng DreamWorks Animation sa mga sinehan sa bansa simula Setyembre 23.