Sen. Rodante Marcoleta, isinailalim sa independent medical exam sa PGH

Kailangang sumailalim ni Senador Rodante Marcoleta sa isang independiyenteng pagsusuri sa kalusugan sa Philippine General Hospital (PGH) sa Maynila kasunod ng utos ng Sandiganbayan Third Division.

Matapos ang higit isang linggong pananatili sa Philippine National Police (PNP) General Hospital sa Camp Crame mula nang maaresto noong Hulyo 6 para sa kasong plunder, inilipat ang 72-taong-gulang na senador patungong PGH lulan ng isang police coaster. Naka-handcuff, naka-wheelchair, at nakasuot ng bulletproof protective vest si Marcoleta habang binabantayan ng mga tauhan ng Criminal Investigation and Detection Group (CIDG) at PNP Health Service upang matiyak ang kanyang seguridad.

Sumailalim ang senador sa iba’t ibang pagsusuri tulad ng blood chemistry, 2D echocardiography, at chest X-ray upang matukoy kung maaari na siyang humarap sa paglilitis at ilipat sa isang regular na pasilidad ng kulungan. Ayon kay CIDG National Capital Region chief Col. John Guiagui, bagamat tumaas ang blood pressure ng senador sa 160/70 pagdating sa ospital mula sa dating 130/80, maayos naman ang kalagayan nito at walang nakitang bagong sakit ang mga doktor. Batay sa paunang pagsusuri, idineklara siyang fit to travel o maaari nang humarap sa pagdinig ng Sandiganbayan.

Nauna nang na-diagnose si Marcoleta ng mild pneumonia, altapresyon, mataas na kolesterol, at degenerative disc disease. Idiniin naman ni PNP spokesman Col. Allen Rae Co na walang espesyal na tratong ibinibigay kay Marcoleta at ordinaryong silid lamang ang tinutuluyan nito sa ospital ng PNP, kung saan siya ibinalik matapos ang pagsusuri sa PGH.