“Swift Effect”: Taylor Swift, Nagpaubos ng Sancerre Wine sa US

Isang iglap lang sa dokumentaryo ni Taylor Swift ang nagdulot ng biglaang pag-ubos ng isang French wine sa Estados Unidos. Matapos masilip ang isang bote ng Sancerre mula sa Terres Blanches sa episode ng documentary na “End of an Era” sa Disney, agad itong natunton ng mga “Swifties” at mabilis na naubos ang stock sa website ng US distributor.

Ang naturang Sancerre, na nagkakahalaga ng humigit-kumulang $40 (P2,300) kada bote, ay naging pinakabagong halimbawa ng tinatawag na “Swiftonomics”—ang kakayahan ni Swift na magpataas ng demand ng isang produkto kahit walang pormal na endorsement.

Ayon kay Laurent Saget ng Terres Blanches, hindi nila inaasahan ang biglang pag-usbong ng interes. Para sa kanya, malaking karangalan ang mapansin ang kanilang wine at ang buong Sancerre appellation, lalo na’t hindi nila kayang bayaran ang ganitong klaseng exposure.

Kilala si Taylor Swift bilang wine lover at dati na ring binanggit ang Sancerre bilang isa sa kanyang paboritong white wine. Dahil dito, lalo pang tumibay ang kasikatan ng Sancerre sa US—isang merkadong bumibili ng halos kalahati ng export nito—kahit pa may bagong taripa sa French wines.

Habang nahihirapan ang ilang bahagi ng wine industry ng France, patuloy namang umaangat ang Sancerre, na sinasabing isa na ngayon sa pinaka-in-demand na French white wines sa Amerika.