PAGASA: Patuloy ang Pagbuhos ng Ulan sa Luzon at Visayas Dahil sa Habagat

Patuloy na mararamdaman ang epekto ng hanging habagat sa malaking bahagi ng bansa ngayong simula ng linggo. Ayon sa ulat ng PAGASA ngayong Lunes, Agosto 17, inaasahan ang maulap na kalangitan na may mga kalat-kalat na pag-ulan at pagkulog-pagkidlat sa Metro Manila, Cordillera Administrative Region, Ilocos Norte, Batanes, Cagayan, Nueva Vizcaya, Nueva Ecija, Tarlac, Pampanga, Bulacan, Cavite, Laguna, Batangas, Rizal, at Occidental Mindoro.

Samantala, mas madalas naman ang pag-ulan sa mga lalawigan ng Ilocos Sur, La Union, Pangasinan, Zambales, at Bataan. Bahagyang maulap hanggang sa maulap na papawirin na may hiwalay na pag-ulan ang mararanasan sa natitirang bahagi ng Luzon at sa buong Visayas. Nagbabala rin ang PAGASA na ang katamtaman hanggang sa kung minsan ay malakas na buhos ng ulan ay maaaring magdulot ng biglaang pagbaha o pagguho ng lupa sa mga apektadong lugar. Sa kabilang dako, makararanas naman ang Mindanao ng bahagyang maulap na kalangitan na may pulo-pulong pag-ulan dahil sa localized thunderstorms.