Chinese Militia at 24 na Bangka, Pinalayas ng PCG sa Kota Island

Matagumpay na pinalayas ng limang miyembro ng Philippine Coast Guard (PCG) ang isang Chinese maritime militia vessel at 24 na maliliit na bangka nito matapos silang mahuling ilegal na nangingisda malapit sa Kota Island sa Kalayaan, Palawan.

​Ayon sa PCG, namataan ang malaking barko ng Tsina na naglagay ng dalawang dosenang maliliit na bangka na kumalat sa loob ng territorial sea ng isla. Bagama’t hindi sumagot sa radio challenge ang Chinese vessel at sa pamamagitan lamang ng hand signals nag-aksyon, agad ding umalis ang mga ito nang lapitan at itaboy ng rubber boat ng PCG. Binigyang-diin ng ahensya na patuloy nilang babantayan ang mga karagatan ng bansa at itataboy ang anumang dayuhang sasakyang-dagat na nanamantala sa pambansang sakop ng Pilipinas.