Baril na ginamit sa Ateneo de Zamboanga shooting, naiwan sa kotse ng ama

Kinuha ng 14-anyos na suspek ang mga baril na ginamit sa pamamaril sa Ateneo de Zamboanga University mula sa sasakyan ng kanyang ama na isang opisyal ng Bureau of Customs (BOC). Ayon kay BOC Commissioner Ariel Nepomuceno, inamin ng ama na si Lt. Elias Jalani II na naiwan sa loob ng sasakyan ang dalawang baril—kabilang ang isang BOC-issued Glock pistol—nang ihatid ng kanyang drayber ang anak sa paaralan. Dahil nakasakay sa kotse ng pamilya, hindi na naisailalim sa inspeksyon ang estudyante ng mga security guard sa campus.
Napatay ng suspek ang isang 15-anyos na mag-aaral at nasugatan ang dalawang iba pa bago ito nagpakamatay, habang nag-iwan din ito ng livestream sa internet sa loob ng dalawang minutong insidente. Dahil sa kapabayaan at kawalan ng pag-iingat sa mga armas ng gobyerno, agad na tinanggal sa posisyon ang ama habang nagpapatuloy ang imbestigasyon ng pulisya sa motibo at sa posibleng kaugnayan ng suspek sa online gaming at cyber groups.