DPWH, magpapatupad ng localized flood control master plans sa tulong ng mga LGUs

Nagtakda ng bagong istratehiya ang Department of Public Works and Highways (DPWH) sa pamumuno ni Secretary Vince Dizon sa pamamagitan ng paglikha ng mga localized drainage master plan sa direktang pakikipag-ugnayan sa mga alkalde, sa halip na maghintay lamang sa pangkalahatang pambansang plano laban sa pagbaha. Kasama sa mga agarang solusyon ang pagpapatayo ng network ng flood-retarding basins sa Quezon City para sa San Juan River basin, pati na rin ang pag-aayos ng mga pumping station at coastal dikes sa Navotas at iba pang flood-prone areas sa bansa.
Upang maiwasan ang pondo sa mga proyektong walang sapat na pag-aaral, mahigpit na ipinag-utos ni Dizon na walang isusumiteng proyekto sa Kongreso para sa 2027 budget kung walang kumpletong master plan, engineered design, feasibility studies, at endorsement mula sa Local at Regional Development Councils. Kasabay nito, patuloy ang pagkilos ng mga maintenance team ng DPWH sa pagkukumpuni ng mga nasirang kalsada at paglilinis sa mga nakabara sa mga kanal habang nananawagan din ang pamahalaan sa publiko para sa tamang pagtatapon ng basura.