Muling magbabalik sa Metro Manila Film Festival ang dating child star na si Xia Vigor para sa pelikulang “2nd Miracle in Cell No. 7” ng Viva Films, kung saan muli niyang makakasama ang aktor na si Aga Muhlach. Ang naturang proyekto ay opisyal nang inihayag bilang isa sa mga kauna-unahang kalahok sa ika-52 edisyon ng MMFF ngayong Disyembre.
Ngunit bago pa man pormal na inanunsyo ang pagbabalik ng pelikula, nakatanggap na si Xia ng imbitasyon para sa isang linggong youth program sa Oxford sa United Kingdom. Sagot ng organisasyong YouthFuel Global ang lahat ng kanyang gastusin kabilang ang pamasahe sa eroplano, tuluyan sa dormitoryo, at ang mismong pag-aaral kung saan makakasama niya ang iba’t ibang estudyante mula sa iba’t ibang bansa. Bukod dito, si Xia ang tanging Pilipino na naimbita sa nasabing batch para mag-aral ng mga paksang tulad ng public speaking at critical thinking sa ilalim ng mga propesor sa Oxford.