Mananatiling hari ng sinehan ang “Spider-Man: Brand New Day” matapos nitong dominahin ang box office sa Hilagang Amerika sa pang-anim na sunod-sunod na linggo. Kumita ang pelikula na pinagbibidahan nina Tom Holland at Zendaya ng karagdagang $18 milyon nitong nakaraang Labor Day weekend sa Estados Unidos. Sa kabuuan, umabot na sa $918 milyon ang kita nito sa Hilagang Amerika at $1.48 bilyon naman sa buong mundo mula nang ipalabas ito noong Hulyo.
Sumunod naman sa ikalawang pwesto ang epic movie ni Christopher Nolan na “The Odyssey” na kumita ng $13 milyon sa ikawalong linggo nito sa mga sinehan. Nasa ikatlong puwesto ang “Coyote vs. Acme” na nakakuha ng $11.3 milyon, kasunod ang bagong crime thriller na “By Any Means” sa ikaapat na pwesto na may $7.4 milyon, at ang horror film na “Insidious: Out of the Further” sa ikalimang pwesto na may $6.5 milyon.