Inihayag ng Iran na isang barkong pangkargamento ang inatake sa malapit sa Qeshm Island sa Strait of Hormuz na nagdulot ng pagkamatay ng isang myembro ng tripulante at pagkasugat ng apat na iba pa. Ang insidenteng ito ay naganap sa isa sa pinakamahahalagang rutang pandagat sa mundo habang patuloy ang tensyon sa pagitan ng Iran at ng US at Israel.
Dahil sa panibagong pag-atake, muling nagkaroon ng malaking pangamba sa pandaigdigang merkado ng enerhiya. Ang Strait of Hormuz ang pangunahing daanan ng humigit-kumulang 20 porsyento ng supply ng langis sa buong mundo, kaya’t ang anumang banta sa seguridad ng mga barko rito ay direktang nagdudulot ng pagtaas ng presyo ng krudo sa pandaigdigang pamilihan at nagbabadyang magpaangat din ng presyo ng petrolyo at bilihin sa ibat ibang bansa.