Noong Agosto 12, pumirma si Pangulong Ferdinand Marcos Jr. ng bagong batas na nagdaragdag ng mga korte para sa Shari’a o Islamic law sa bansa.
Sa ilalim ng bagong batas, tatlong dagdag na Shari’a judicial districts at labindalawang circuit courts ang itatatag sa iba’t ibang bahagi ng Pilipinas.
Mula sa 51, magiging 63 na ang bilang ng Shari’a circuit courts. Sa bagong batas, magkakaroon ng limang korte sa ika-anim na distrito, tatlo sa ika-pitong distrito, at apat sa ika-walong distrito.
Narito ang mga bagong distrito at ang kanilang saklaw:
- Ika-anim na Distrito: Bukidnon, Misamis Oriental, Misamis Occidental, Camiguin, Cagayan de Oro City, at mga lalawigan sa Rehiyon XI at XIII.
- Ikapitong Distrito: Mga lalawigan sa Rehiyon VI, VII, at VIII.
- Ikawalong Distrito: Metro Manila, mga lalawigan sa Cordillera Administrative Region, Rehiyon I, II, III, IV-A, V, at MIMAROPA (Mindoro-Marinduque-Romblon-Palawan).
Bago ang batas na ito, mayroon lamang limang Shari’a judicial districts:
- Unang Distrito: Lalawigan ng Sulu
- Ikalawang Distrito: Tawi-Tawi
- Ikatlong Distrito: Basilan, Zamboanga del Norte, Zamboanga del Sur, at mga lungsod ng Dipolog, Pagadian, at Zamboanga
- Ika-apat na Distrito: Lanao del Norte, Lanao del Sur, at mga lungsod ng Iligan at Marawi
- Ikalimang Distrito: Maguindanao, North Cotabato, Sultan Kudarat, at Cotabato City
Ang mga Shari’a courts ay nasa ilalim ng administratibong pangangasiwa ng Korte Suprema at sumasaklaw sa mga kaugalian at personal na batas ng mga Muslim. Gayunpaman, hindi nito saklaw ang mga batas kriminal ng bansa, na nananatiling nakapaloob sa Revised Penal Code at mga espesyal na penal laws.