Magkakaroon ng tatlong araw na nationwide transport strike ang grupo ng transportasyon na Manibela mula Setyembre 28 hanggang 30, 2026. Layunin ng protesta na ipanawagan ang agarang aksyon ng pamahalaan laban sa sunod-sunod na pagtaas ng presyo ng langis na labis na nagpapabigat sa pangkabuhayan ng mga tsuper at operator.
Binatikos ni Manibela Chairman Mar Valbuena ang Department of Energy (DOE) dahil sa kawalan umano ng pampalubag-loob na hakbang habang patuloy na nababawasan ang pang-araw-araw na kita ng mga tsuper. Samantala, iginiit ng Department of Transportation (DOTr) na ginagawa ng pamahalaan ang lahat ng paraan tulad ng fuel discounts upang matulungan ang sektor at huling opsyon lamang ang pagtaas ng pasahe upang maiwasan ang lalong pagtaas ng antas ng implasyon sa bansa.