Magandang balita para sa mga tagahanga ng Korean wave dahil opisyal nang kumpirmadong darating sa Pilipinas ang sikat na aktor na si Gong Yoo. Inanunsyo ng kanyang ahensya na kasama ang Maynila sa mga hihintuan ng kanyang gaganaping Asia fan meeting tour na pinamagatang “The Long Take.” Bukod sa bansa, bibisitahin din ng aktor ang mga lungsod ng Seoul, Jakarta, Yokohama, Bangkok, at Macau para makasalamuha ang kanyang mga supporters.
Ito ang kauna-unahang pagkakataon na magkakaroon ng opisyal na fan meeting sa Pilipinas ang aktor na minahal ng mga Pilipino sa kanyang mga natatanging karakter sa “Goblin,” “Coffee Prince,” “Squid Game,” at ang blockbuster zombie movie na “Train to Busan.” Kaakibat ng anunsyo ang isang sulat-kamay na mensahe mula mismo kay Gong Yoo kung saan taos-puso siyang nagpasalamat sa maraming taon ng suporta at pagmamahal ng mga tagahanga. Bagamat kumpirmado na ang pagbisita, pinananabikan pa rin ng lahat ang mga susunod na detalye tulad ng eksaktong petsa, lugar na pagdarausan, at ang presyo ng mga tiket para sa nasabing okasyon.