Marami ang nagtataka sa kawalan ng Fil-Am setter na si Alohi Robins-Hardy sa opisyal na line-up ng Farm Fresh Foxies para sa PVL Invitational Conference at sa nakaraang PVL on Tour. Sa kabila ng pananahimik ng pamunuan ng koponan tungkol sa kanyang kinaroroonan, itinuturing ng marami na isang malaking pagsubok ang kanyang pagkawala lalo na’t naging susi siya sa magandang performance ng koponan noong nakaraang All-Filipino Conference.
Upang punan ang puwang sa posisyon ng setter, nananatiling matatag ang koponan sa pamumuno ni Louie Romero kasama ang veteran setter na si Iris Tolenada at ang bagong dagdag na si Ela Marjanna Raagas. Sa kabila ng adjustment, kumpiyansa pa rin ang Foxies sa ilalim ng gabay ng kanilang Japanese coach na si Koji Tsuzurabara, habang aasahan naman ang husay ng mga manlalarong sina Trisha Tubu, Ces Molina, Riri Meneses, Royse Tubino, Ara Galang, at Mylene Paat sa kanilang kampanya.