Target ng Department of Justice (DOJ) na matapos sa loob ng susunod na dalawang linggo ang pagsusuri sa mga dokumento kaugnay ng hiling ng Estados Unidos na i-extradite ang tagapagtatag ng Kingdom of Jesus Christ na si Apollo Quiboloy. Ayon kay DOJ Secretary Fredderick Vida, binibigyang-prayoridad ng pamahalaan ang mga kapal-kapal na dokumento upang matupad ang mga obligasyon sa kasunduan ng Pilipinas at US, habang sinusunod ang tamang proseso at mga alituntunin ng Korte Suprema.
Matapos ang dalawang linggong rebyu, nakatakdang ihain ng DOJ ang kaukulang petisyon sa korte. Ang hiling na extradition ng gobyerno ng US ay nag-ugat sa mga kasong pederal noong 2021 sa California, kung saan nahaharap si Quiboloy sa mga paratang ng sex trafficking, sex trafficking ng mga bata, at bulk cash smuggling. Kasalukuyang nakakulong si Quiboloy sa bansa habang nahaharap din sa hiwalay na mga kasong qualified human trafficking at child abuse na una na niyang itinanggi.