Inamin ng aktor na si Dennis Trillo na flattered o labis siyang natutuwa sa positibong reaksyon ng mga netizens sa kanilang mga nakatutuwang TikTok skits ng kanyang asawang si Jennylyn Mercado. Bagama’t kilala bilang isang mahiyain at seryosong aktor na hindi mahilig sa social media noong una, naisip niya kalaunan na mahalaga ito sa kanyang career bilang isang artista.
Ayon kay Dennis, nagsimula lamang sa simpleng pagsubok ang kanyang pagba-viral. Nang makita niyang maraming tao ang napapangiti at nakakalimot sa kanilang mga problema dahil sa kanyang mga kalokohan sa video, nagdesisyon siyang ipagpatuloy ito. Karamihan sa mga konseptong ginagaya nila ay nanggagaling sa kanyang misis na si Jennylyn, na kadalasang nagpapakita ng mga nakatutuwang eksena tungkol sa buhay-mag-asawa. Bukod pa rito, nagpasalamat din ang aktor sa mga netizens na nagkukumpara sa kanya sa Hollywood star na si Jonathan Bailey ng sikat na seryeng Bridgerton.