Nagtungo sa lansangan ang iba’t ibang grupo ng kabataan, estudyante, at alyansa sa Metro Manila upang magprotesta at humingi ng pananagutan mula sa pamahalaan bago ang paggunita sa ika-54 na anibersaryo ng deklarasyon ng Martial Law. Naglakad ang mga demonstrador patungong EDSA Shrine at Supreme Court upang isulong ang transparency sa gobyerno, pagpasa ng batas laban sa political dynasties, at pananagutan sa mga usapin ng korapsyon.
Kabilang din sa mga pangunahing panawagan ng mga grupo ang pagpapatibay ng hatol na pagkakasala laban kay Vice President Sara Duterte sa kanyang impeachment trial sa Senado. Samantala, pinarating naman ng August Twenty One Movement (ATOM) ang kanilang pagtutol sa desisyon ng Korte Suprema na nagpawalang-sala kay dating First Lady Imelda Marcos, habang muling ipinaalala ng mga rallyista ang mga naging kaso ng pag-aresto, pagpapahirap, at pagpatay noong panahon ng batas militar.