Magpapatupad ang Bangko Sentral ng Pilipinas (BSP) ng mas istriktong kontrol sa mga bayad na may kinalaman sa online gambling gamit ang digital platforms, lalo na para maprotektahan ang mga menor de edad at vulnerable na grupo.
Sa inilabas na draft circular para sa public comment, nilinaw ng BSP na kailangang magpatupad ng mas mahigpit na safeguards ang mga bangko, e-wallets, at iba pang payment service providers (PSPs) bago payagang iproseso ang online gambling payments.
Mga bagong patakaran:
- Daily spending caps at time limits para sa paggamit ng online gambling payments
- Biometric verification gaya ng facial recognition para matiyak na mga legal na adult lang ang makakagamit
- Kailangang magkaroon ng hiwalay na account, tinawag na Online Gambling Transaction Account (OGTA), na may limit na 20% lang ng average daily balance ng user
- Limitasyon ng paggamit ng OGTA sa anim na oras kada araw
- Kung sosobrahan ang paggamit, ipapatupad ang 24-oras na cooling-off period
- Pag-disable ng anumang lending services sa app habang naka-activate ang OGTA
Bukod dito, ipinagbawal ng BSP ang mga empleyado ng financial institutions na makilahok sa online gambling para mapanatili ang tiwala ng publiko sa banking system.
Para sa gambling operators:
Kailangang pumasa sa mahigpit na onboarding requirements tulad ng:
- Kumpletong lisensya
- Pagpapahayag ng tunay na may-ari
- Pagsunod sa anti-money laundering laws
Parusa sa di-pagsunod:
- Suspensyon o pagkakaltas ng lisensya sa online gambling payment services
- Multa hanggang P1 milyon bawat paglabag
Kapag na-finalize na ang patakaran, ito ay epektibo 15 araw matapos mailathala.
Ang mga PSP na kasalukuyang nag-aalok ng gambling payments ay bibigyan ng anim na buwan para sumunod bago harapin ang suspensyon ng kanilang operasyon.
Layunin ng BSP na protektahan ang kalusugan ng financial system at panatilihin ang responsableng paggamit ng digital financial services.