Mariing itinanggi ng Bureau of Customs (BOC) at Independent Commission for Infrastructure (ICI) ang paratang na sapilitang kinuha ang 34 luxury vehicles na iniuugnay kay dating kongresista Elizaldy “Zaldy” Co.
Ayon kay ICI special adviser Rodolfo Azurin, hindi umano kinuha ng mga awtoridad ang mga susi ng mga sasakyan, taliwas sa pahayag ng abogado ni Co na si Ruy Rondain. Giit pa niya, walang saysay ang alegasyong may isang taong may hawak ng 34 susi.
Ipinaliwanag ng BOC na walo sa siyam na luxury vehicles na nakarehistro kay Co, sa kanyang asawa at sa Sunwest Inc. ang nasamsam sa isang condominium sa BGC, Taguig noong Enero 8 dahil sa umano’y paglabag sa importation at hindi nabayarang buwis.
Gayunman, sinabi ng ICI na may impormasyon silang tumuturo sa 15 sasakyan pa lamang, kaya’t nagtaka sila sa sinasabing 34 units. Dahil dito, sinabi ni Azurin na susuriin ng ICI ang posibilidad ng karagdagang sasakyan na hindi saklaw ng kasalukuyang search warrant.
Ayon naman sa BOC, naka-body cam ang buong operasyon at may kopya ng search warrant ang mga abogado ng may-ari ng sasakyan. Patunay umano ito na maayos at legal ang isinagawang pagsamsam.
Si Co ay kabilang sa mga pangunahing personalidad na iniimbestigahan sa anomalous flood control projects at kinasuhan ng graft ng Sandiganbayan noong Disyembre 2025.