Nagpapatuloy ang hindi inaasahang alyansa ng dalawang dating magkaribal na network sa telebisyon. Inihayag ng ABS-CBN na mas marami pang malalaking proyekto ang ipapalabas sa GMA Network, patunay na mas nagiging solid pa ang kanilang kolaborasyon para sa mga manonood.
Pagkatapos ng anim na taong pagkawala sa ere, magbabalik na sa Setyembre ang sikat na late-night talk show ni Vice Ganda na Gandang Gabi Vice. Bukod sa Kapamilya Channel at iWant, mapapanood na rin ito sa kauna-unahang pagkakataon sa GMA. Kinumpirma rin ng ABS-CBN ang paglunsad ng Pinoy Big Brother Collab 3.0 sa darating na Oktubre kasama pa rin ang Kapuso network. Kasabay nito, lilipat na rin sa mas tipid at bagong bahay ang kilalang PBB house matapos isara ang orihinal na bahay nito kamakailan.