P1B Pondo, Inilaan sa Project NOAH para sa Mas Mabilis na Monitoring sa Baha

Naglabas ang Department of Budget and Management ng P1 bilyon pondo upang palakasin ang kakayahan ng Project NOAH sa pamamagitan ng paggamit ng artificial intelligence para sa mas maagang pagbibigay ng babala sa baha at pagsubaybay sa mga sakuna.

Ang pondong ito ay kasunod ng matitinding pagbaha sa Luzon at Metro Manila dulot ng habagat at mga nagdaang bagyo. Gagamitin ang P935 milyon para sa mga pangkalahatang serbisyo sa pananaliksik habang ang natitirang P65 milyon ay para naman sa pamamahala at superbisyon. Kabilang din sa paggagamitan nito ang pagbili ng makabagong kagamitang pang-teknolohiya at agham, pagpapatayo ng operational support systems, at pagkuha ng mga dalubhasang tauhan.

Ayon sa pamunuan ng Department of Budget and Management, ang pamumuhunan sa agham at teknolohiya ay isang hakbang sa pag-iwas upang mas maagang makapaghanda ang pamahalaan at mga komunidad bago pa man maging malaking trahedya ang anumang sakuna.